ഓരോ വിദ്യാർത്ഥിയുടെയും നൈസർഗികമായ കഴിവുകളും അഭിരുചികളും വികസിപ്പിച്ചെടുത്ത്‌ അവരെ മികവിലേക്കുയർത്താൻ സാധിച്ചാലേ വിദ്യാഭ്യാസത്തിന്റെ ലക്ഷ്യം പൂർണമാകൂ. പഠനപ്രയാസം നേരിടുന്ന ഓരോ കുട്ടിക്കും അവർക്കാവശ്യമായ പ്രത്യേക പഠനാനുഭവങ്ങൾ നൽകേണ്ടതുണ്ട്. ഈ ലക്ഷ്യം മുൻനിർത്തി ഈ അദ്ധ്യയനവർഷത്തിൽ നടപ്പിലാക്കുന്ന പദ്ധതിയാണ് ശ്രദ്ധ – മികവിലേക്കൊരു ചുവട്.

ശ്രദ്ധപദ്ധതി പഠനത്തിൽ പ്രയാസം നേരിടുന്ന കുട്ടികളെ കണ്ടെത്താനും അവരെ മുൻ നിരയിൽ എത്തിക്കാൻ സഹായകമാകുന്ന പഠന പിന്തുണ നൽകാനും ലക്ഷ്യമിടുന്നു. ആദ്യ ഘട്ടമെന്ന നിലയിൽ 3,5,8 ക്ലാസ്സുകളിൽ മലയാളം,ഇംഗ്ലീഷ്,കണക്കു,ശാസ്ത്രം എന്നീ വിഷയങ്ങളിൽ പ്രയാസം നേരിടുന്ന കുട്ടികൾക്കാണ് പരിഗണന നൽകുന്നത്.

ആദ്യ പാദ വാർഷിക പരീക്ഷയുടെ വിശകലനത്തിലൂടെ ഓരോ കുട്ടിയും നേടിയ പഠന നേട്ടങ്ങളോടൊപ്പം, നേരിടുന്ന വെല്ലുവിളികളും പ്രയാസങ്ങളും ഓരോ അധ്യാപകനും കണ്ടെത്തി അവരെ വേറെ വേറെ കൂട്ടങ്ങളിലായി തിരിച്ചാണ് ശ്രദ്ധ പഠന പിന്തുണ പരിപാടി നടത്തുന്നത്. ഓരോ കുട്ടിക്കും അർഹമായ പിന്തുണ ലഭിക്കേണ്ടതിനാൽ അതാത് ക്ലാസ് തല കൂട്ടങ്ങളിലെ കുട്ടികളുടെ എണ്ണം 25ൽ കൂടുതലുണ്ടെങ്കിൽ ഒന്നിലധികം പഠനകൂട്ടങ്ങൾ ആക്കും.

വിദ്യാലയത്തിൽ ഓരോ വിഷയത്തിലും ഒന്നാം ഘട്ടത്തിൽ ഒരു ഏകദിന ക്യാമ്പും ഉയർന്ന ഒന്നിടവിട്ട മൂന്നു ദിവസങ്ങളിൽ ഒരു മണിക്കൂർ നീണ്ടു നിൽക്കുന്ന പഠനപ്രവർത്തനങ്ങളുമാണ് നടക്കേണ്ടത്. ഏകദിന ക്യാമ്പിലും തുടർന്നുള്ള സെക്ഷനുകളിലുമായി നടക്കുന്ന പ്രവർത്തനങ്ങളിലൂടെ നിശ്ചിതമായ പഠന തെളിവുകൾ ഉണ്ടാകണം. രചനകൾ, ചിത്രങ്ങൾ, നിർമ്മിതികൾ, ഗ്രാഫിക് ഓർഗനൈസർ, റിപ്പോർട്ടുകൾ, വാചിക പാഠങ്ങൾ, പഠന പ്രകടനങ്ങൾ, സ്വയം വിശകലനങ്ങൾ എന്നിങ്ങനെ വിവിധങ്ങളായ ഉൽപ്പന്നങ്ങൾ ഓരോ പ്രവർത്തനത്തിലൂടെയും രൂപപ്പെടണം. അത് കുട്ടിയുടെ പ്രൊഫൈലിന്റെ ഭാഗമാവുകയും ചെയ്യും.

‘ശ്രദ്ധ’ പദ്ധതിയുടെ ആദ്യ ഘട്ടത്തിലെ പ്രവർത്തനാനുഭവങ്ങൾ, അധ്യാപകർ വികസിപ്പിച്ചെടുത്ത മൗലിക പ്രവർത്തന രീതികൾ, കുട്ടികളുടെ പഠനത്തിലുണ്ടായ പുരോഗതി എന്നിവ വിലയിരുത്തിയ ശേഷമായിരിക്കും രണ്ടാം ഘട്ട പ്രവർത്തനങ്ങൾ ആരംഭിക്കുക.